Milot Rashica ka filluar shkëlqimin në futbollin gjerman edhe në vitin 2020.

Sulmuesi i Kosovës ka realizuar për Werderin në fitoren 3-2 ndaj Borussia Dortmundit.

Rashica nuk u largua gjatë afatit kalimtar të janarit nga Werder, edhe pse ofertat nuk munguan për të.

Tani ish-mesfushori gjerman Dietmar Hamann ka këshilluar kampionët në fuqi të Gjermanisë, mos ta transferojnë Leroy Sanen e Manchester Cityt.

“Nëse një trajner si Pep Guardiola nuk e mban një lojtar me një talent të tillë, atëherë Bayerni duhet të ndalet dhe të mendojë”.

“Sane ka ndryshuar menaxherë dhe shumë njerëz janë munduar të ndikojnë tek ai, por e kot. Nuk mendoj se do të ndryshojë diçka në Munich, ka talent, por problemi mbetet te sjellja e tij”, tha Hamann.

Tutje ish-mesfushori i Bayernit ka thënë se Bavarezët duhet të shikojnë te Werderi për transferimin e Rashicës.

“Nëse Bayern dëshiron të transferojë sulmues, le të shikojnë te Werderi. Milot Rashica mund të jetë një opsion më i lirë dhe më i mirë. Kur të lëndohet Gnabry dhe Coman, Rashica mund t’i zëvendësojë pa problem”, përfundoi Hamann.

Bavarezët nuk do ta kenë të lehtë as transferimin e Rashicës, për të cilin Dortmundi po interesohet, por edhe skuadrat angleze. /Telegrafi/